MOTIVAZIUN
Dapi varga 600 onns stat agl ur dil curtin d’honur sper la caplutta da Sontga Onna a Trun in ischi. Quel savess raquintar bein enqual historia, sco quella dalla Ligia Grischa. Igl onn 1424 han ins confirmau, approfundau ed amplificau la Ligia Sura – che las vischnauncas dallas valladas dil Rein Anteriur e dil Rein Posteriur havevan fundau enzacons onns avon a Glion – cun ulteriuras vischnauncas e renumnau ella Ligia Grischa. Quei ei succediu a Trun sut igl ischi. L’allianza ha garantiu la segirtad sin las vias ed aschia possibilitau il traffic e commerci liber. Ils acturs han engirau: «schi ditg che stattan cuolms e vals» ed han firmau cun quels plaids lur empermischun da procurar per segirtad e defensiun vicendeivla sco era da segirar dretgs e possess.
Il num Ligia Grischa deriva probablamein dil ponn grisch ch’ins duvrava pli baul per producir la vestgadira digl um cumin. Pli tard ei igl entir cantun vegnius numnaus suenter quel – il cantun Grischun.
Quest onn eis ei 600 onns dapi l’engirament dalla Ligia Grischa sut igl ischi. A Trun vulan ins festivar quei giubileum a moda speciala. Per quei intent ha la vischnaunca fundau la stad 2020 ina gruppa da lavur ed incumbensau quella cun las lavurs preparatorias per igl onn da commemoraziun.
Il giubileum vegn festivaus sut il tetel «Sut igl Ischi 2024» e quei duront igl entir onn. Treis occurrenzas pli grondas fuorman ils puncts culminonts. Plinavon ein contribuziuns d’ulteriuras organisaziuns culturalas e d’autras uniuns planisadas. Per il mument ei quei la Societad da musica Trun, il Museum Sursilvan Cuort Ligia Grischa ed ulteriurs museums en Surselva. Ensemen vegnan els a procurar per in onn da giubileum plein variaziun. Las lavurs da preparaziun e las singulas occurrenzas vegnan documentadas cun films che procuran per regurdientschas durablas dallas festivitads.
